St. George´s School og Versló hafa staðið í nemendaskiptum um nokkurt skeið og vikuna 19.-25. október 2015 dvöldu átta nemendur af náttúrufræðibraut ásamt kennara í framhaldsskólanum St. George´s í Newport, Rhode Island. Þetta er einkaskóli sem tekur einungis við mjög góðum nemendum. Nemendurnir okkar fengu afbragðs móttökur og sýna þeir hluta af upplifun sinni þar á myndbandi sem má sjá hér að neðan. Núna á mánudaginn 14. mars endurgjalda svo fimm nemendur og tveir kennarar frá St. George´s heimsóknina. Þeir munu sækja tíma og fara í skoðunarferðir, bæði í Reykjavík og út á land. 

Nemendur í stjörnufræði voru nýlega á ferð á Kanaríeyjum þar sem skoðaður var Norræni stjörnusjónaukinn á La Palma, en við íslendingar eigum í honum einn hundraðshlut á móti hinum Norðurlöndunum. Einnig var heimsóttur stærsti eins-spegils stjörnusjónauki heims, hinn 10,4 metra Gran Telescopio de Canarias, auk vísindasafnsins í La Laguna. 

Þær Melkorka Diljá, Sara Rut og Vigdís Birna í 6-U eru í áfanganum Líf303 þar sem lokaverkefnið gengur út á að undirbúa og framkvæma rannsókn. Þær völdu að gera rannsókn á eigin lífstíl sem felst meðal annars í að mæla óþarfa rusl sem maðurinn hendir frá sér. Þær munu vigta allt það rusl sem þær henda frá sér í eina viku og flokka það í almennt, plast, pappa og lífrænt rusl. Viku seinna ætla þær að lifa rusllausum lífstíll (Zero Waste Lifestyle) . Þær hafa m.a. fengið styrk frá verslunninni Móðurást fyrir hreinlætisvörunni mánabikar sem er margnota silikonbikar sem kemur í stað dömubinda og tappa. Þess má líka geta að Verzlingar fá 20% afslátt af mánabikarnum á meðan þær lifa sínum rusllausa lífstíl sem er 7.-14. mars.

Eðlisfræðifélag Íslands heldur ár hvert eðlisfræðikeppni fyrir nemendur á framhaldsskólastigi. Keppnin er í tveimur umferðum, annarsvegar landskeppni þar sem öllum nemendum framhaldsskóla er boðið að taka þátt og hins vegar lokakeppni fyrir 14 efstu keppendurna úr landskeppninni. 
Ísak Valsson í 6-X var einn þeirra nemenda sem komst áfram í lokakeppnina sem fram fer í Háskóla Íslands helgina 2. og 3. apríl næstkomandi. 

Við óskum honum innilega til hamingju með góðan árangur. 

Skólanum verður lokað frá hádegi í dag vegna árshátíðar starfsmanna.