Nemendur heimsækja Brüssel
Dagana 6. – 11. mars lögðu nemendur alþjóðabrautar á 3. ári land undir fót og heimsóttu merkisborgina Brüssel. Meðal viðkomustaða 3-A í borginni má nefna Framkvæmdastjórn ESB, safn um Evrópuþingið, sendiráð Íslands í Belgíu og síðast en ekki síst, fastanefnd Íslands hjá Atlantshafsbandalaginu. Síðastnefnda heimsóknin var sérlega eftirminnileg; móttökur og kynning framúrskarandi, auk þess að fastanefndin er nýflutt í nýjar og glæsilegar höfuðstöðvar samtakanna. Þá var einnig skotist til miðaldaborgarinnar Bruges, skoðuð dómkirkja heilags Mikjáls og Gúdúlu (þau eru verndardýrlingar Brüssel) og farið á heimaleik með Anderlecht. Heimsóknin er hluti áfangans LOKA3ES05 sem er lokaverkefnisáfangi alþjóðabrautar.
Opið hús 21. mars
Fimmtudaginn 21. mars verður Verzlunarskóli Íslands opinn fyrir nemendur 10. bekkjar og forráðamenn þeirra á milli kl. 17.00 - 18.30. Sérstök áhersla verður lögð á að kynna námsframboð, þá aðstöðu sem stendur til boða og félagslífið. Skólastjórnendur, kennarar og námsráðgjafar verða á staðnum til að taka á móti gestum og svara spurningum og munu nemendur bjóða upp á leiðsögn um skólann. Bókasafn skólans verður opið gestum og eru allir hjartanlega velkomnir þangað.
Heimsókn
Dagana 17. til 24.mars taka 23 nemendur á 1. ári með þýsku sem 3.mál á móti nemendum úr menntaskólanum Ida Ehre Schule í Hamburg, en Hamborg er önnur stærsta borg Þýskalands og er staðsett norðarlega í Þýskalandi.
Dvelja nemendurnir hjá íslenskum fjölskyldum og kynnast við það íslenskum háttum, siðum og venjum. Auk þess vinna þeir að sameiginlegu Erasmus verkefni með íslensku nemendunum þar sem aðáherslan á Íslandi verður á náttúru og legu landsins. Nemendurnir fara á Þingvöll og Gullna hringinn, heimsækja Hellisheiðavirkjun og Náttúrminjasafnið í Perlunni, að endingu fara þeir í Bláa lónið.
Í September 2019 munu síðan íslensku nemendurnir dvelja í eina viku hjá þýskum fjölskyldum í Hamborg. Aðaláhersla verkefnisins þar verður á sögu og þróun Hamborgar.
Norður-Atlantshafsbekkurinn fullskipaður
Umsóknarfrestur um Norður-Atlantshafsbekkinn (nánari upplýsingar https://www.verslo.is/namid/nordur-atlantshafsbekkurinn/) rann út í lok febrúar síðastliðinn. Alls bárust 50 umsóknir frá löndunum fjórum og þar af 12 frá Íslandi. Það er því ljóst að þessi bekkur fer af stað nú í haust 2019. Ákveðið var að taka inn 32 nemendur og koma 10 þeirra frá Íslandi.
Eins og komið hefur fram áður í kynningu á náminu þá byrja nemendur í Gribskov Gymnasium í Danmörku og eru þar fyrstu tvær annirnar. Síðan er farið til Miðnám á Kambsdali í Færeyjum í eina önn og þá næstu á Íslandi í Verzlunarskóla Íslands. Síðasta árið er svo á Grænlandi í GUX Sisimuit og útskrifast nemendur þar með stúdentspróf. Það er óhætt að segja að allir hlakka mikið til, jafnt nemendur sem starfsmenn skólanna, og munu allir leggja sig fram um að láta þetta ganga vel. Svarbréf til umsækjenda hafa verið send út. Við óskum þeim nemendum sem fengu pláss til hamingju.
Frakkar í heimsókn
Dagana 15. til 23.mars taka 24 nemendur á 1. ári með frönsku sem 3.mál á móti jafnöldrum sínum úr menntaskólanum Le Lycée Chateaubriand í Rennes, en borgin Rennes 215.000 manna borg á Bretagne skaga.
Dvelja nemendurnir hjá íslenskum fjölskyldum og kynnast við það íslenskum háttum, siðum og venjum. Auk þess að sitja í tímum mun hópurinn fara Gullna hringinn, heimsækja Hellisheiðavirkjun, DeCode Genetics, Kjarvalstaði, Þjóðminjasafnið, þau heimsækja einnig vinnustofu listamanns og hring um Reykjanesið.
Á haustmánuðum 2019 munu síðan íslensku ungmennin dvelja í eina viku hjá frönskum fjölskyldum á Bretagn skaga.
Gestir í Verzló
Þessa dagana eru í Verzló tveir þýskir kennarar sem starfa í menntaskóla í Berlín, þær Valerie og Heidi. Þær eru hér í starfskynningu og auk þess að sitja í kennslustundum hjá ýmsum kennurum eru þær að taka viðtöl við kennara og starfsfólk til að fá heildarmynd að skólanum og starfsemi hans.