Forritunarkeppni framhaldsskólanna fór fram í tuttugasta sinn sl. laugardag 24. apríl. Metþátttaka var að þessu sinni en alls 58 lið frá þrettán framhaldsskólum tóku þátt. Í annað sinn frá upphafi og annað árið í röð fór keppnin eingöngu fram í gegnum netið. Frá Versló voru fjögur lið og hittust krakkarnir í skólanum til að búa til góða stemningu þótt auðvitað jafnist fátt á við þegar öll liðin sitja nálægt hvert öðru í Háskólanum í Reykjavík.

Föstudaginn 28. maí kl. 14:00 munu nemendur sem hafa lokið námi í Fagnámi verslunar og þjónustu taka á móti skírteinum sínum. Fagnám verslunar og þjónustu er ný námslína ætluð starfandi verslunarfólki samhliða vinnu. Námsbrautin er samstarfsverkefni skólans og Starfsmenntasjóðs verslunar- og skrifstofufólks.

Brautskráning stúdenta mun fara fram í húsnæði skólans laugardaginn 29. maí næstkomandi. Athöfnin fer fram í Bláa sal og hefst klukkan 13:00. Gera má ráð fyrir að útskriftin taki um tvo og hálfan tíma og verður streymt frá athöfninni líkt og í fyrra. Endanlegt fyrirkomulag og aðkoma foreldra að athöfninni mun ráðast af þeim sóttvarnartakmörkunum sem þá verða í gildi.

Opið hús sem vera átti í dag, 8. apríl, fellur niður vegna núgildandi sóttvarnarreglna. Við bendum þeim sem vilja kynna sér skólann á innritunarsíðu okkar en þar er að finna allar helstu upplýsingar er varða skólann og innritunina.