Upphaf skólastarfs í skugga Covid-19

Skrifstofa skólans er nú opin á ný að loknu sumarleyfi og próf á sumarönn í fjarnámi hefjast í dag, 5 ágúst. Til þess að uppfylla skilyrði yfirvalda um fjöldatakmarkanir og tveggja metra reglu, verða próf lögð fyrir í íþróttahúsi skólans. Próftöflu fjarnáms á sumarönn má nálgast hér.

Núverandi fjöldatakmarkanir á samkomum gilda til og með 13. ágúst og mun það hafa áhrif á fyrirhugað undirbúningsnámskeið í stærðfræði. Námskeiðið hefur reynst nemendum mjög góður undirbúningur fyrir krefjandi nám og í stað þess að fella það niður mun námskeiðið fara fram í fjarnámi. Eins og gafst vel í vor mun samskiptaforritið TEAMS notað til gagnvirkrar kennslu og samskipta kennara við nemendur. Nemendur munu á næstu dögum fá frekari leiðbeiningar sendar í pósti frá kennurunum.

Enn er óljóst með hvaða hætti skólahald hefst á þessu skólaári en ljóst má vera af fréttum undanfarið að kapp verður lagt á að skólar taki til starfa að nýju að loknu sumarleyfi. Öll áform Verzlunarskólans lúta að því að kennsla muni hefjast samkvæmt stundaskrá þriðjudaginn 18. ágúst. Óskastaðan er vitanlega sú að framhaldsskólar fái sambærilega undanþágu frá reglum um fjöldatakmarkanir og grunnskólar. Þá gæti skólahald hafist með nokkuð eðlilegum hætti, með ríka áherslu á sóttvarnir og hreinlæti. Komi til þess að skólum verði gert að loka húsnæði sínu, þá mun kennsla færast yfir í fjarnám líkt og í vor. Þriðji möguleikinn er að blanda saman staðnámi og fjarnámi innan þeirra takmarkana sem landsmönnum er gert að fara eftir á hverjum tíma. Verið er að skoða mögulegar útfærslur á slíku fyrirkomulagi. Verði niðurstaðan sambland af fjarnámi og staðnámi mun áhersla verða lögð á að nýnemar hafi forgang inn í skólann, a.m.k. fyrstu vikurnar.

Líkt og með annað skólahald mun nýnemakynningin sem fyrirhuguð er mánudaginn 17. ágúst taka mið af þeim reglum um sóttvarnir sem skólanum verður gert að hlíta. Nýnemar eru því beðnir um að fylgjast með fréttum á heimasíðu skólans.

Nemendur eru hvattir til þess að fylgjast vel með upplýsingafundum og fréttum af þróun mála næstu daga.