Skólareglur Verzlunarskóla Íslands

1.1. Sýnd er háttvísi og prúðmennska í skólanum og alls staðar þar sem komið er fram í nafni hans.
1.2. Nemendur (ritstjórar, ritnefndir, greinahöfundar og aðrir hliðstæðir aðilar sem koma að gerð og birtingu efnis innan skólans) bera ábyrgð á útgáfustarfsemi sem þeir standa fyrir. Við alla fjölmiðlun, t.d. útvarpsstarfsemi og miðlun myndefnis, sem og á vefsíðum  og samfélagsmiðlum nefnda Nemendafélagsins er gætt velsæmis og almennrar háttvísi í gerð og framsetningu efnis og allri umfjöllun.
1.3. Nemendum er óheimilt að gefa út efni í nafni skólans sem ekki hefur verið borið undir félagslífsfulltrúa skólans.
1.4. Óviðeigandi eða ærumeiðandi orðalag í útgáfu nemenda, í hvers kyns fjölmiðlun þeirra, sem og á vefsíðum og samfélagsmiðlum í nafni nefnda nemendafélagsins getur varðað brottrekstri úr skóla.
1.5. Almennt gildir sú regla að foreldrum eða forráðamönnum nemenda skal gert viðvart svo þeir geti nýtt sér andmælarétt sinn ef um brottvísun er að ræða. Þó getur til þess komið að vísa þurfi nemanda úr skóla fyrirvaralaust.

2.1. Í kennslustundum eru nemendur vakandi, þeir virða verkstjórn kennara og gæta þess að valda ekki ónæði.
2.2. Kennara er heimilt að vísa nemanda úr kennslustund að gefnu tilefni, t.d. fyrir að spilla vinnufriði og fyrir að vera óvirkur í kennslustund. Síendurtekin brot eru tilkynnt skólastjórn.
2.3. Nemendur ganga snyrtilega um skólann og lóð hans og stuðla að því að kennslustofur og aðrar vistarverur séu ávallt snyrtilegar. Enginn má skilja eftir sig rusl, hvorki innan dyra né utan og skal allt rusl flokkað á viðeigandi hátt.
2.4. Almennt er bannað að neyta matar á meðan kennsla fer fram. Ef kennari gefur leyfi og frágangur er snyrtilegur má víkja frá banni.
2.5. Nemendur sem  vinna tjón á eigum skólans þurfa að bæta fyrir skemmdir sem þeir hafa valdið.
2.6. Lánþegar bera ábyrgð á því sem þeir fá lánað út á nafn sitt á bókasafni skólans og þurfa að vera reiðubúnir að greiða gjald fyrir vanskil eða skemmdir á gögnum bókasafns.
2.7. Í tölvustofum, sérgreinastofum og á bókasafni gilda umgengnisreglur sem birtar eru þar.
2.8. Nemendum er heimilt að hafa snjalltæki meðferðis í skólann og tengjast skólanetinu. Tækin skulu geymd afsíðis í kennslustundum, t.d. í símaboxi eða ofan í tösku með slökkt á hljóði.
2.9. Kennari ber ábyrgð á verklagi í sínum kennslustundum og hefur því fullt umboð skólans til að leyfa eða banna notkun tölvu og annarra snjalltækja.
2.10. Kennslustofur eru ekki opinber svæði. Upptaka og myndataka á einstaklingi án leyfis viðkomandi í kennslustofunni brýtur gegn opinberum reglum um persónuvernd. Slík notkun snjalltækja er því óheimil með öllu og telst alvarlegt agabrot.
2.11. Brjóti nemandi reglur skólans um notkun snjalltækja bregst skólinn við eins og um agabrot sé að ræða. Ítrekuð brot geta haft íþyngjandi afleiðingar fyrir viðkomandi nemanda.
2.12. Nemendur bera ábyrgð á hegðun sinni í ferðum á vegum skólans. Við brot á skólareglum verður nemandi sendur heim á eigin kostnað.
2.13. Nemendur sem framfylgja ekki reglum kennara í námsferðum fá skriflega áminningu og fá ekki að fara í fleiri ferðir á vegum skólans á sinni skólagöngu.

3.1. Mætingaskráning fer fram í upphafi kennslustundar. Nemendur sem ekki eru mættir við skráningu en mæta áður en 10 mínútur eru liðnar af kennslustund fá seint. Nemendur sem mæta eftir þann tíma, eða mæta ekki, fá fjarvist skráða.
3.2. Yfirlit yfir skólasókn er sent til nemenda og forráðamanna nemenda yngri en 18 ára á þriggja vikna fresti. Ef nemendur vilja gera athugasemdir við fjarvistaskráningu sína  verða þeir að koma athugasemdum til viðkomandi kennara innan 7 daga.  Breytingar eru ekki gerðar á viðveruskráningu að þeim tíma liðnum.
3.3. Nemandi sem hefur 95–100% mætingarhlutfall og yfir 90% raunmætingu eftir hverja önn vinnur sér inn einingu fyrir mætingu. Þessar einingar, sem að hámarki geta orðið sex, eru þá umfram þær einingar sem tilgreindar eru á hverri námsbraut.
3.4. Ef raunmæting nemanda í áfanga er undir 75%, á miðri önn eða síðar, verður nemandi skráður úr viðkomandi áfanga. Nemandi á kost á að taka áfangann í fjarnámi skólans á næstu önn.
3.5. Heimilt er að veita  undanþágu frá kröfum um raunmætingu vegna sérstakra aðstæðna eða veikinda. Beiðnir þess efnis þurfa að berast til skólastjóra áður en raunmæting fer undir 75%.
3.6. Ef nemandi er skráður veikur en er sannarlega ekki veikur breytir skólinn skráningu viðkomandi í fjarvist. Telst það  brot á skólareglum og áminning er veitt ef nemandi sinnir ekki fjarveruskráningu af heilindum.
3.7. Skólastjóri getur vikið nemendum úr skóla í lengri eða skemmri tíma virði þeir ekki reglur skólans um skólasókn.

4.1. Til þess að standast áfanga þurfa nemendur að ná lokaeinkunn 5,0 eða hærra. Lokaeinkunn í áfanga byggist ýmist á lokaprófi ásamt vinnueinkunn í áfanganum eða símati sem er án lokaprófs. Vægi hvers matsþáttar er breytilegt milli einstakra áfanga og er vægið tilgreint í námsáætlun. Í námsáætlun kemur einnig fram ef nemendur þurfa að ná lágmarkseinkunn á lokaprófi til þess að vinnueinkunn gildi. Þar kemur líka fram hvernig endurtekt í áfanganum fer fram. Lokapróf eru haldin í lok annar, þ.e. í desember og í maí. Þá eru lokapróf sumarannar fjarnáms haldin í ágúst.
4.2. Nemendum gefast þrjú tækifæri til að ljúka áfanga: standast lokanámsmat á önn, ná endurtektarprófi eða ljúka áfanga í fjarnámi  á næstu önn á eftir. Nemandi sem nær ekki viðmiðum í lokanámsmati annar á rétt á að taka endurtektarpróf. Ef nemandi annað hvort fellur á endurtektarprófi eða kýs að taka það ekki þarf hann að endurtaka áfangann í fjarnámi Verzlunarskólans. Endurtektarpróf sem eiga við um áfanga á haustönn eru haldin í janúar en þau sem eiga við um áfanga á vorönn eru haldin í júní.  Þeir sem hefja fjarnám á vorönn taka fjarnámspróf í maí en þeir sem hefja slíkt nám á sumarönn taka próf í ágúst. Engin endurtektarpróf eru haldin vegna áfanga í fjarnámi. Nemendur sem endurtaka áfanga í fjarnámi verða sjálfir að skrá sig í áfangann á heimasíðu skólans. Þegar um símatsáfanga er að ræða geta aðrar reglur gilt og er þeirra þá getið í námsáætlun viðkomandi áfanga. Greiða þarf fyrir endurtektarpróf og fjarnámsáfanga.
4.3. Nemandi má að hámarki endurtaka þrjá áfanga á önn. Ef nemandi er með fall í fleiri áföngum en þremur á önn, þarf hann að hafa lokið öllum áföngum í endurtektarprófum annarinnar eða fjarnámi á næstu önn (vorönn eða sumarönn) til að geta flust á milli ára. Nemandi sem fellur um bekk getur sótt til skólastjóra um að fá að setjast aftur í sama bekk. Nemandinn á þá rétt á að fá metna þá áfanga þar sem einkunn er 7,0 eða hærri. Þetta á þó ekki við um íþróttir.
4.4. Nemandi getur útskrifast sem stúdent með lægri einkunn en 5,0 í einum eða tveimur áföngum, en þó má einkunn í þeim ekki vera lægri en 2,0. Þetta gildir bara um lokaáfanga eða staka áfanga og fær nemandinn ekki einingar fyrir viðkomandi áfanga. Einingafjöldinn til stúdentsprófs má þó aldrei verða minni en sá fjöldi sem tiltekinn er á viðkomandi námsbraut.
4.5. Skólanum ber ekki skylda til að halda endurtektarpróf nema fyrir þá sem eru að ljúka stúdentsprófi  frá skólanum.
4.6. Nemandi sem ekki mætir í lokapróf eða sjúkrapróf, telst ekki hafa lokið skólaárinu og verður tekinn út af nemendaskrá skólans.
4.7. Ákveðnir áfangar telja til verslunarprófs en þeir eru mismunandi eftir brautum. Verslunarpróf er afhent við brautskráningu.
4.8. Á stúdentsprófi reiknast aðaleinkunn sem vegið meðaltal allra námsáfanga sem nemandi hefur staðist á viðkomandi námsbraut.
4.9. Nemendur eiga rétt á að fá útskýringar á mati sem liggur að baki lokaeinkunn í áfanga innan fimm virkra daga frá birtingu einkunnar. Prófsýning er haldin í desember og maí og er prófsýning tækifæri nemanda til að sjá prófúrlausn sína í viðurvist kennara. Vilji nemendur, sem ekki hafa náð lágmarkseinkunn, þá eigi una mati kennarans geta þeir snúið sér til skólastjóra og óskað eftir mati sérstaks prófdómara. Þá skal kveða til hlutlausan prófdómara sem metur prófúrlausnir. Úrskurður hans er endanlegur og verður ekki skotið til æðra stjórnvalds.
4.10. Nemandi getur að hámarki verið skráður í 40 einingar á önn, samtals í dagskóla og fjarnámi.
4.11. Nemendur fylgja námsferli námsbrautar sinnar og geta ekki flýtt fyrir sér í námi með því að ljúka dagskólaáfanga í fjarnámi áður en kemur að honum á námsferli. Í þeim tilvikum þurfa nemendur að endurtaka áfangann með bekknum sínum.
4.12. Til þess að ljúka stúdentsprófi frá Verzlunarskóla Íslands þurfa nemendur að hafa lokið að lágmarki 100 einingum við skólann.
4.13. Skólastjóri getur veitt undanþágu frá einstökum reglum ef veigamiklar röksemdir eru fyrir hendi.

5.1. Símar, snjallúr og snjalltæki eru stranglega bönnuð að prófborði. Að öðru leyti er tilgreint sérstaklega hvaða hjálpartæki nemendur mega hafa með sér.
5.2. Óheimilt er að taka yfirhafnir, töskur, poka eða pappír inn í prófstofur.  Þó er heimilt að hafa meðferðis nesti.
5.3. Nemendum í prófi er ekki heimilt að yfirgefa prófstofu án þess að prófvörður sé til staðar að fylgja þeim.
5.4. Nemendum er skylt að vera um kyrrt í sætum sínum fyrstu 40 mínútur próftímans í lokaprófum. Önnur próf, hlutapróf, eru ýmist haldin í kennslustund í viðkomandi fagi eða í fyrstu kennslustund á þriðjudegi (þriðjudagspróf). Nemendum er skylt að vera um kyrrt í sætum sínum fyrstu 25 mínútur próftímans í slíkum prófum.
5.5. Kennari, í því fagi sem prófað er í, gengur á milli stofa og svarar spurningum nemenda. Kennarar koma einu sinni í hverja stofu.
5.6. Verði nemandi uppvís að alvarlegu misferli í prófi, skal kalla til skólastjórnanda sem tekur prófgögn nemandans í sína vörslu og vísar nemandanum úr prófi. Minniháttar brot nægir að tilkynna prófstjóra.

6.1.  Nemendur, sem eru að vinna verkefni vegna náms, hafa forgang í tölvur skólans.
6.2. Aðeins einn nemandi hefur heimild til að nýta hvert notandanafn. Óheimilt er að lána öðrum notandanafn sitt og óheimilt er að reyna að tengjast tölvubúnaði skólans með öðru notandanafni en því sem nemandi hefur fengið úthlutað.
6.3. Óheimilt er að nota aðgang að neti skólans til þess að reyna að komast ólöglega inn á net eða tölvur í eigu annarra og einnig er óheimilt að sækja, senda, geyma eða nota á neti skólans forrit sem hægt er að nota til innbrota eða annarra skemmdarverka.
6.4. Ef notandi skólanets hyggst nýta hugbúnað eða gögn í eigu annars eða annarra notenda þarf hann leyfi frá eiganda. Almennt er afritun hugbúnaðar og gagna í eigu annarra notenda óheimil. Um allan hugbúnað gilda ákvæði höfundarréttarlaga og því er meginreglan sú að óheimilt er að afrita hugbúnað nema það sé tekið fram í notendaleyfi.
6.5. Óheimilt er að villa á sér heimildir í samskiptum á Netinu, svo sem með því að koma fram undir fölsku nafni í tölvupósti. Óheimilt er að senda keðjubréf og annan ruslpóst. Óheimilt er að setja óþarfa forrit eða  gögn inn á gagnasvæði sem notendur hafa aðgang að.
6.6. Óheimilt er að reyna að breyta eða hafa áhrif á notkunarmöguleika annarra notenda. Óheimilt er að gera breytingar eða hafa áhrif á uppsetningar eða skjáborð tölvu, svo sem með því að fjarlægja eða breyta kerfisskrám, breyta bakgrunni, táknmyndum eða skjáhvíld sé það hægt.
6.7. Skólinn áskilur sér rétt til að meðhöndla gögn og notendaaðgang eftir því sem þurfa þykir svo sem að fara yfir, skoða og eyða efni á gagnasvæðum.

7.1. Vellíðan er einn af lykilþáttum í öllu starfi skólans. Komi upp grunur um eineltis- eða ofbeldismál er fylgt áætlun Verzlunarskólans gegn einelti og ofbeldi sem birt er á heimasíðu skólans.
7.2. Skólinn er heilsueflandi framhaldsskóli og er notkun áfengis eða annarra vímuefna í húsakynnum skólans, viðburðum í nafni hans eða ferðalögum skipulögðum af skólanum bönnuð. Brot á þessari reglu getur leitt til brottvísunar úr skóla.
7.3. Stuðlað er að öryggi nemenda og er með öllu óheimilt að bera vopn í skól­anum, hvort sem um er að ræða hnífa, skot­vopn, raf­byssur eða önnur þau vopn er falla undir skil­grein­ingar vopna­laga nr. 16/1988. Öll mál hjá nem­endum yngri en 18 ára sem upp koma í skól­anum sem tengjast vopnaburði eru til­kynnt til barna­verndar.

8.1. Rísi alvarlegur ágreiningur milli nemenda, kennara og/eða annarra starfsmanna skólans og takist hlutaðeigandi ekki að finna lausn á málinu má vísa því til skólastjóra. Uni málsaðilar ekki niðurstöðu skólastjóra má vísa málinu til skólanefndar.
8.2. Brjóti nemandi skólareglur er honum veitt skrifleg viðvörun áður en til áminningar kemur nema brotið sé þess eðlis að því verði ekki við komið, svo sem brot á almennum hegningarlögum. Fái nemandi áminningu skal hún vera skrifleg þar sem fram kemur tilefni áminningar og þau viðbrögð sem fylgja í kjölfarið brjóti nemandi aftur af sér. Nemandanum skal gefinn kostur á að andmæla áminningu. Áminningar eru skriflegar í INNU.
8.3. Brjóti ólögráða nemandi reglur skólans eru foreldrar/forráðamenn upplýstir um það. Við meðferð mála skal sérstaklega gæta ákvæða stjórnsýslulaga nr. 37/1993, laga nr. 121/1989 um skráningu og meðferð persónuupplýsinga og upplýsingalaga nr. 50/1996.
8.4. Í samráði við skólastjórn ákveður skólastjóri hvaða viðurlögum skuli beitt vegna alvarlegra brota á skólareglum.
8.5. Viðurlög við broti á skólareglum geta verið eftirfarandi, eftir því hve skólayfirvöld telja brotið alvarlegt:  áminning skólastjóra, brottrekstur, tímabundinn eða endanlegur.