1. Forsíða
  2. Þjónusta
  3. Nemendaþjónusta
  4. Prófaundirbúningur
Hlusta

Prófaundirbúningur

Með því að skipuleggja tímann, vinna jafnt og þétt og huga að svefni og líðan verður auðveldara að takast á við prófatörnina.

Gátlisti fyrir próf

Góður undirbúningur byrjar á skipulagi. Fáðu yfirsýn yfir það sem er fram undan, skiptu námsefninu niður og gefðu þér nægan tíma til að rifja upp.

✓ Skoðaðu próftöfluna
Fáðu yfirsýn yfir prófin sem eru fram undan og skipuleggðu lesturinn fyrir hvert próf.
✓ Finndu góðan stað til að læra á
Veldu stað þar sem þú getur einbeitt þér. Á Bókasafni VÍ er góð námsaðstaða sem þú getur nýtt þér.
✓ Skipuleggðu lesturinn
Skiptu námsefninu niður á dagana sem þú hefur til umráða. Hafðu námsáætlun og gátlista kennara til hliðsjónar og settu þér raunhæf markmið fyrir hvern dag. Hér er vikuáætlun sem sniðugt er að prenta út og fylla inn í. Sumum hentar vel að nota Pomodoro-aðferðina til að halda einbeitingu og skipuleggja tímann.
✓ Taktu námsefnið saman
Finndu til og flokkaðu námsbækur, glósur, verkefni, skyndipróf og önnur gögn úr hverri námsgrein. Þá fer minni tími í að leita að efni þegar þú sest niður að læra.
✓ Leitaðu aðstoðar tímanlega
Ef eitthvað í námsefninu er óljóst skaltu ekki bíða fram á síðustu stundu. Leitaðu til kennara, fjölskyldu eða vina sem geta hjálpað þér að ná tökum á efninu.
✓ Prófaðu þekkinguna
Farðu vel yfir öll skyndipróf og eldri verkefni. Búðu til þín eigin próf úr námsefninu.
✓ Láttu spyrja þig út úr
Fáðu einhvern til að spyrja þig úr námsefninu eða notaðu spjöld til að æfa hugtök og lykilatriði. Að útskýra efnið upphátt með eigin orðum getur líka hjálpað þér að sjá hvað þú kannt og hvað þarf að rifja betur upp. Prófaðu að nota Quizlet.
✓ Nýttu síðustu klukkutímana í upprifjun
Þegar styttist í prófið skaltu rifja upp lykilatriðin.
✓ Haltu góðri rútínu
Reyndu að halda reglu á svefni og matarvenjum á prófatímabilinu. Reglulegar máltíðir, hvíld og góður nætursvefn fyrir próf skipta máli.
✓ Gefðu þér tíma til að slaka á
Taktu þér hlé frá lestrinum. Stutt gönguferð, hreyfing, slökun eða einfaldlega smá hvíld getur hjálpað þér að ná einbeitingunni aftur. Prófaðu að hlusta á Núvitundarsetrið.

Gátlisti í prófi

Góður undirbúningur skiptir máli en það skiptir líka máli hvernig þú vinnur úr prófinu. Gefðu þér tíma til að fá yfirsýn, lestu spurningarnar vel og fylgstu með tímanum.

1. Mættu tímanlega
Gefðu þér góðan tíma til að koma þér fyrir. Hafðu með þér hressingu í gegnsæjum umbúðum, í samræmi við prófreglur skólans.
2. Skrifaðu niður minnisatriði
Þegar prófið hefst getur verið gott að skrá formúlur, lykilhugtök og önnur atriði sem þú vilt muna á rissblað.
3. Fylgstu vel með fyrirmælum
Hlustaðu á munnleg fyrirmæli og lestu skrifleg fyrirmæli vandlega áður en þú byrjar.
4. Fáðu yfirsýn yfir prófið
Skoðaðu prófið í heild og athugaðu fjölda spurninga og vægi þeirra.
5. Skipuleggðu tímann
Hafðu klukku þar sem þú sérð hana og miðaðu tímann við vægi spurninganna. Eyddu ekki meiri tíma í spurningu en vægi hennar er.
6. Spurðu ef eitthvað er óljóst
Ef þú skilur ekki fyrirmæli skaltu spyrja kennara frekar en að eyða tíma í að reyna að átta þig á þeim. Óskaðu strax eftir hjálp.
7. Byrjaðu á því sem þú kannt
Svaraðu léttustu spurningunum fyrst. Breyttu ekki svari eftir á nema þú sért viss í þinni sök.
8. Ekki festast í einni spurningu
Ef þú ert í vafa skaltu halda áfram og koma aftur að spurningunni síðar.
9. Svaraðu skýrt og hnitmiðað
Lestu spurninguna vel og vertu viss um að svarið nái til þess sem spurt er um.

Tímastjórnun í prófi

Góð tímastjórnun hjálpar þér að nýta próftímann vel og minnkar líkurnar á að þú eyðir of miklum tíma í eina spurningu.

  • Mættu með úr eða klukku í prófið.
  • Mundu að prófið sjálft er alltaf 100% – óháð því hversu mikið það gildir í lokaeinkunn.
  • Notaðu 10 mínútur í byrjun og 10 mínútur í lokin til að komast í gang, lesa yfir o.fl.

Þumalputtaregla

Ef próftími er 1 klukkustund = 60 mínútur

5% spurning
≈ 3 mínútur
10% spurning
≈ 6 mínútur
15% spurning
≈ 9 mínútur
20% spurning
≈ 12 mínútur
Mundu: Spurning sem gildir lítið ætti ekki að taka stóran hluta próftímans. Ef þú festist skaltu halda áfram og koma aftur að spurningunni ef tími gefst.

Gangi þér vel í prófunum!Góður undirbúningur, nægur svefn og skynsamleg tímastjórnun geta gert prófdaginn mun auðveldari.