ENSK3HP05

Í þessum áfanga er fjallað um bækur og kvikmyndir J.K. Rowling um Harry Potter. Farið verður yfir bækurnar, unnin verkefni úr þeim og málefni skoðuð frá ýmsum sjónarhornum. Við köfum í atriði á borð við:  

• áhrif á ungt fólk og menningu almennt 
• stjórnmál og samfélag: Hliðstæður í raunheimum 
• átök góðs og ills 
• kynjasjónarmið og minnihlutahópar 
• persónusköpun 

Unnin verða ýmiskonar verkefni svo sem ritunarverkefni, munnlegar kynningar og myndbandsverkefni auk þess sem áfanga lýkur með skriflegu prófi. Ætlast er til að nemendur taki virkan þátt í umræðum í kennslustundum og mun það vera ríkur þáttur í lokaeinkunn. 

Forþekking á Harry Potter er æskileg. 

Námsmat er útfært í kennsluáætlun í samræmi við skólanámskrá.

Tveir áfangar á öðru þrepi.

Nemandi skal hafa tileinkað sér:

• Aukinn orðaforða í ensku. 

• Þekkingu á sérstöðu verka Rowling í bókmenntasögunni. 

• Samhengi verka hennar í bókmenntasögu og samtímamenningu. 

• Aðferðir til úrvinnslu og yfirvegun menningarlegra, trúarlegra og siðferðilegra málefna í bókmenntum.  

• Skilning á hugtökum á borð við ’allegoríu’ og ’fantasía’. 

Nemandi skal hafa öðlast leikni í:

• Ritun á ólíkum tegundum texta.

• Beitingu orðaforða um bókmenntir og tungumál.

• Að setja fram hugsanir sínar um efni bókmennta á góðri ensku. 

• Greiningu á myndefni og bókmenntatexta. 

• Að tjá sig munnlega á ensku um ýmis bókmenntahugtök. 

Nemandi skal hafa öðlast hæfni í að:

• Leggja  gagnrýnið mat á texta, jafnt bókmenntatexta sem fræðilegan texta. 

• Rita formlega ritgerð með reglum um inngang, efnisyrðingar og meginmál um bókmenntaleg efni, þar sem fræðilegu hugtök eru notuð rétt.

• Skrifa skapandi texta byggt á bókmenntum þar sem hugarflugið er notað og stílbrögðum, myndmáli og líkingamáli er beitt. 

• Flytja vel uppbyggða kynningu um efni þar sem röksemdafærsla er byggð á dæmum og brugðist er við fyrirspurnum á góðri og blæbrigðaríkri ensku.