Nemendur fjölmenntu á Gæðablóð

Það var leikhúsdagur hjá nemendum á 1. og 2. ári í vikunni þegar þeir héldu í Austurbæ til að sjá Gæðablóð. Verkið var sýnt í Þjóðleikhúsinu síðastliðinn vetur en hefur nú verið sett sérstaklega upp fyrir framhaldsskólanemendur í Austurbæ.

Í Gæðablóði segja þeir Davíð Þór Katrínarson, Jónmundur Grétarsson og Unnsteinn Manuel Stefánsson sögur úr eigin lífi. Þeir eiga það sameiginlegt að vera Íslendingar sem rekja uppruna sinn til tveggja heimsálfa. Í sýningunni sviðsetja þeir bæði sprenghlægileg og grafalvarleg atvik úr lífi sínu og varpa meðal annars ljósi á sjálfsmynd, uppruna, fordóma og stöðu fólks af ólíkum uppruna í íslensku samfélagi.

Skólinn ákvað að nýta þetta góða tækifæri og keypti tvær sýningar fyrir nemendur. Þannig gafst stórum hópi kostur á að upplifa leikhúsið og sjá hvernig persónulegar frásagnir, leikur og sviðsetning geta vakið bæði hlátur og umhugsun. Leikhúsferðir sem þessar færa skólastarfið út fyrir kennslustofuna og gefa nemendum sameiginlega menningarupplifun sem getur orðið tilefni til samtals og vangaveltna.