Dagana 5. 6. og 7. júní verður opnunartími skólans styttri vegna námskeiða starfsmanna. Opið verður frá klukkan 9:00-13:00. 

8. júní tekur svo við hefðbundinn opnunartími frá 8:15-15:00. 

Skólinn lokar klukkan 12:00 í dag vegna vorferðar starfsmanna. Skólinn opnar aftur miðvikudaginn 31. maí kl: 08:00

Ljósmyndari: Arnaldur Halldórsson

Brautskráning stúdenta frá Verzlunarskólanum fór fram laugardaginn 27. maí við hátíðlega athöfn í Borgarleikhúsinu.  Athöfnin var tvískipt, í fyrri athöfninni voru nemendur af viðskiptabraut og nýsköpunar- og listabraut og á þeirri seinni voru nemendur af alþjóðabraut og náttúrufræðibraut. Að þessu sinni brautskráðust 348 nýstúdentar frá Verzlunarskólanum en aldrei hafa jafn margir nemendur útskrifast í einu ef frá er talin brautskráning skólans fyrir 5 árum þegar tveir árgangar útskrifuðust á sama tíma, sá fyrsti í þriggja ára námi og sá síðasti í fjögurra ára námi. 

Föstudaginn 26. maí var Kristján Helgi Gíslason útskrifaður frá Verzlunarskóla Íslands með Fagpróf í verslun og þjónustu.

Verzlunarskóli Íslands býður upp á fagnám fyrir starfandi verslunarfólk í samstarfi við Starfsmennasjóð verslunar- og skriftstofufólks. Námið er 90 einingar og er blanda af fjarnámi og vinnustaðanámi í fyrirtækjunum. Markmið námsins, er meðal annars að nemendur auki þekkingu sína og færni á vinnustað, þjálfist í að veita viðskiptavinum framúrskarandi þjónustu og geti stýrt verkefnum í verslun í samræmi við skipulag og áætlanir.

Skólinn óskar Kristjáni Helga innilega til hamingju með áfangann. 

Brautskráning stúdenta fer fram laugardaginn 27. maí í Borgarleikhúsinu. Athöfn nemenda sem útskrifast af nýsköpunar- og listabraut og viðskiptabraut hefst klukkan 12:00. Athöfn nemenda sem útskrifast af alþjóðabraut og náttúrufræðibraut hefst klukkan 14:00. Nemendur af opinni braut útskrifast annaðhvort klukkan 12:00 eða 14:00.

Keppnin um vistabikarinn í Harry Potter áfanganum var óvenju hörð á vorönn 2023. Liðin, Slytherin og Ravenclaw voru svo gott sem hnífjöfn alla önnina, en það var í lokabaráttunni á kvistboltamótinu sem úrslitin réðust og Slytherin tryggði sér sigurinn í annað skipti síðan að keppnin hófst. Gryffindor vann sterkt brons, en galdraguðirnir reyndust Hufflepuff ekki hliðhollir í þessari umferð. Við eigum von á flottum hópi galdranema næsta vetur og verður spennandi að sjá hvernig keppnin þróast áfram, en á bakvið sigurinn er elja í námi og sigur í margskonar keppnum frá spurningakeppnum, yfir í limbó og feluleik. Kennari áfangans er eins og sést alveg þannig séð sáttur með útkomuna, en vildi gjarnan að sitt fólk fari að næla í bikarinn! 

Sjúkrapróf 2. og 3. árs nema fer fram miðvikudaginn 17. maí klukkan 11:00. 

Sjúkrapróf 1. árs nema fer fram föstudaginn 19.maí kl. 8:30.

Einkunnir munu birtast nemendum í INNU sunnudaginn 21. maí klukkan 20:00. Foreldrar og forráðamenn ólögráða nemenda hafa aðgang að niðurstöðunum og eru hvattir til þess að fara yfir einkunnirnar með börnum sínum. Við minnum á að lögráða nemendur geta veitt foreldrum/forráðamönnum aðgang að INNU með einföldum hætti á sínu svæði.

Prófsýning verður mánudaginn 22. maí milli 8:30 og 9:45.

Dagana 30. maí, 31. maí og 1. júní verða endurtektarpróf klukkan 9:00. Niðurröðun prófa birtist síðar á vefsíðu skólans. Nemendur sem ekki ná endurtektarprófi, eða kjósa að þreyta þau ekki, þurfa að endurtaka áfangann í fjarnámi Verzlunarskólans. Mikilvægt er að þeir nemendur, sem ekki ná endurtektarprófi, skrái sig sjálfir í fjarnámið á heimasíðu skólans um leið og niðurstöður liggja fyrir. 

Á starfsmannafundi 3. maí síðastliðinn var tekin ákvörðun um að gera breytingu sem miðar að því að jafna fjölda símatsáfanga og áfanga með lokanámsmat í próftöflu milli brauta og lína. Markmiðið er að allir nemendur, óháð braut, línu eða árgangi hafi að jafnaði lokanámsmat í þremur áföngum í próftöflu og þá að þrír til fjórir fimm eininga áfangar á hverri önn verði í símati hjá hverjum nemanda.

Þessari ákvörðun fylgja breytingar á áður auglýstu skóladagatali. settir verða tveir námsmats- og jöfnunardagar inn á miðja önnina og verða þeir í tengslum við haustfríið. Hefðbundin kennsla skv. stundaskrá fellur niður en nemendur mega þó eiga von á sjálfstæðri verkefnavinnu eða verkefnaskilum þessa daga.

Tengil í uppfært skóladagatal næsta skólaárs má finna hér.

Peysufatadagur Verzlunarskóla Íslands er haldinn hátíðlegur í dag. Eftir skemmtilega dagskrá í Bláa sal skólans var haldið niður í miðbæ þar sem nemendur gengu frá Hallgrímskirkju niður Skólavörðustíg og stigu svo dans á Ingólfstorgi. Eftir dansinn fóru nemendur í hópmyndatöku við Háskóla Íslands og enduðu svo á hádegisverði í Gullhömrum. Dagskránni lýkur með dansleik í kvöld.

Við óskum nemendum á öðru ári til hamingju með daginn.