Nýnemavikan setur svip á skólalífið

Það er óhætt að segja að nýnemavikan sé frábær leið til að kynnast, mynda vinatengsl og skapa skemmtilegar minningar. Nýnemar hafa verið hvattir til að taka þátt í fjölbreyttum þemadögum sem hafa sett líflegan svip á daglegt skólastarf.

Á mánudaginn mættu þeir í sannkölluðum sólar- og sumarfílingi með sólgleraugu, blómaskreytingar og í litríkum fötum. Þriðjudagurinn var tileinkaður ofurhetjunum og fylltist skólinn af Spiderman, Wonder Woman, Superman og fleiri hetjum. Á miðvikudaginn tóku svo svartklæddir „Men in Black“ yfir.

En nýnemavikan snýst ekki einungis um að skarta flottum búningum – heldur einnig um liðsheild og skemmtilegar áskoranir. Bekkir safna stigum með ýmsum verkefnum, t.a.m. hafa þeir verið með upplestur fyrir bókasafnsstarfsmenn, hrósað  Matbúðarkonunum, keppt við kennara í armbeygjum, tínt rusl á skólalóðinni og jafnvel sungið þjóðsönginn í tíma hjá öðrum bekkjum. Að auki eru nýnemar á fullu að skreyta stofurnar sínar.

Vikunni lýkur með nýnemaferð á föstudaginn sem hefst klukkan 13:00. Nemendur snúa aftur í skólann um kl. 18:00, borða saman og taka þátt í skemmtilegri dagskrá sem endar á miðnætti. Skipulagningin er í höndum Skemmtó sem hefur lagt mikla vinnu í að gera vikuna sem eftirminnilegasta.