Starfsfólk VÍ
Fréttir frá alþjóðasamstarfinu
Komdu í heimsókn á bókasafnið
Fjarnám
2026-2027
Í áfanganum læra nemendur að færa flóknara bókhald bæði dagbókarfærslur og uppgjör. Einnig læra nemendur um skuldabréf og verðtryggingu skuldabréfa. Kennsla byggist á innlögn kennara, umræðum, dæmatímum og verkefnavinnu. Lögð er áhersla á að nemendur séu sjálfstæðir í vinnubrögðum og geri sér grein fyrir eigin ábyrgð. Nemendur vinna mest sjálfstætt.
Verkefni og vinna nemanda yfir önnina ásamt lokaprófi.
Nemendur læra að gera upp bókhald út frá ófullkomnum upplýsingum og um sameiningu fyrirtækja. Nemendur læra að setja upp sjóðstreymi og taka tillit til skattareglna í uppgjöri. Einnig læra þeir að meta innra virði við sameiningu fyrirtækja. Kennslan byggist á innlögnum, umræðum, vinnutímum og verkefnavinnu. Lögð er áhersla á að nemendur séu sjálfstæðir í vinnubrögðum og geri sér grein fyrir eigin ábyrgð. Nemendur vinna mest sjálfstætt.
Í lok áfangans er lokapróf sem tekið er í Innu og gildir á móti hlutaprófum, verkefnum og ástundun nemandans á önninni.
Áfanginn ,Lífið í Köben’ miðar að því að veita nemendum dýrmæt úrræði og þekkingu um danska samfélagið og menningu. Nemendur munu fylgjast með þróun mála í Danmörku með því að lesa dönsku miðlana og greina helstu fréttir, sem stuðlar að dýrmætum lesskilningi um nútímasamfélagið. Einnig munum við lesa um lífið í dönskum háskólum og þá menningu sem þar ríkir.
Áfanginn mun veita nemendum mikilvægar upplýsingar um leiðir til að sækja um vinnu og nám í Danmörku, skrá sig inn í landið og hvernig SU kerfið virkar. Kynntir verða helstu háskólarnir í Kaupmannahöfn, svo sem CBS, DTU og KEA, auk lýðháskóla, en við munum einnig kynna okkur danska vinnustaði. Nemendur öðlast því bæði innsýn í danskt háskólaumhverfi og danska fyrirtækjamenningu. Leitast verður eftir því að fá fyrirlestur frá dönskum rekstraraðilum um tengt því síðarnefnda. Í áfanganum verður lögð áhersla á lesskilning, hlustun og tal, með það markmið að efla tungumálafærni nemenda í raunverulegum aðstæðum.
Áfanginn er símatsáfangi. Lokaeinkunn byggir á mati á virkni og verkefnaskilum þar sem færniþættirnir þrír, lestur, hlustun og tal, eru metnir jöfnum höndum.
Um bekkjarkennslu er að ræða og fer kennslan að mestu leyti fram á dönsku. Lögð er áhersla á að nemendur séu sjálfstæðir í vinnubrögðum, geri sér grein fyrir eigin ábyrgð, geti fylgst með framvindu í námi sínu og metið eigin færni. Nemendur vinna ýmist sjálfstætt, í pörum eða í hópum. Áhersla er á notkun upplýsingatækni og vinna nemendur að stærri verkefnum sem þeir gera grein fyrir bæði skriflega og munnlega í bekknum. Fimm þættir tungumálanáms eru þjálfaðir jafnt og þétt og er ætlast til að nemendur hafi öðlast hæfni B2 í lestri og ritun samkvæmt Evrópsku tungumálamöppunni. Í tali, samræðum og hlustun er hæfniviðmiðið B1. Í lok annar afhenda nemendur verkefnabók sína (Book Creator\Padlet) með helstu verkefnum annarinnar og gera grein fyrir efni hennar í munnlegu prófi.
Símat.
Áfanginn er grunnáfangi í eðlisfræði, þar sem æfð er framsetning og lausn hagnýtra verkefna sem tengjast einfaldri hreyfingu hluta eftir línu, fallhreyfingu, lögmálum Newtons, vélrænni orku og raforku. Kennslan fer aðallega fram með samblandi af fyrirlestrum og dæmareikningi, auk verkefnavinnu. Verklegar æfingar eru einnig hluti kennslunnar þar sem nemendur vinna saman í hópum og skila verkbók.
Byggir á lokaprófi, tímaprófum, verklegum æfingum, vinnusemi í kennslutímum, heimanámi og hópvinnu.
Hefðbundin kennsla fer fram í kennslutímum, þar sem hvatt er til umræðu og fyrirspurna eftir því sem tilefni gefast til. Mikil áhersla er lögð á dæmareikning. Auk þessa eru verklegar æfingar í raungreinastofu. Í raungreinastofu er tölvubúnaður sem gerir nemendum kleift að skrá niðurstöður og vinna verkefni úr tilrauninni. Nemendum er ætlað að tileinka sér og öðlast skilning á efni kennslutexta og viðbótarefni sem fram kemur í kennslustundum.
Lokapróf, annarpróf, verklegar æfingar, ástundun og tímaverkefni.
Inngangur að lífrænni efnafræði sem er undirstöðugrein fyrir læknisfræði, líftækni, lyfjafræði og fleiri greinar heilbrigðisvísinda, umhverfisfræði, verkfræði og efnafræði. Megináhersla áfangans er á byggingu og IUPAC nafngiftir helstu lífrænna efna og efnaflokka. Virkir hópar, rúmfræði sameinda og nokkrar helstu tegundir lífrænna efnahvarfa. Hefðbundin kennsla fer fram í kennslutímum, þar sem hvatt er til umræðu og fyrirspurna eftir því sem tilefni gefast til. Mikil áhersla er lögð á að vinna verkefni. Auk þessa eru verklegar æfingar í raungreinastofu. Nemendum er ætlað að tileinka sér og öðlast skilning á efni kennslutexta og viðbótarefni sem fram kemur í kennslustundum. Efni áfangans er til inntökuprófs í læknisfræði og sjúkraþjálfun við HÍ.
Lokapróf, annarpróf, verklegar æfingar, heimadæmi.
Í þessum áfanga er fjallað um bækur og kvikmyndir J.K. Rowling um Harry Potter. Farið verður yfir efni og persónur bókanna, verkefni úr þeim verða unnin og málefni skoðuð frá ýmsum sjónarhornum. Meðal annars verður unnið með eftirfarandi atriði:
a) áhrif á ungt fólk og menningu almennt b) stjórnmál og samfélag: Hliðstæður í raunheimum c) átök góðs og ills d) kynjasjónarmið og minnihlutahópa e) persónusköpun og bókmenntahugtök.
Valin bók verður lesin og efni hennar rætt. Horft verður á eina kvikmynd og verkefni unnið úr henni. Nemendur vinna mikið í hópum og áfanginn er að miklu leyti leikjamiðaður. Öll vinna í námskeiðinu fer fram á ensku.
Unnin verða ýmiss konar verkefni svo sem ritunarverkefni, munnlegar kynningar og myndbandsverkefni, auk þess sem áfanga lýkur með skriflegu prófi úr valinni bók. Ætlast er til að nemendur taki virkan þátt í umræðum í kennslustundum og mun það vera ríkur þáttur í lokaeinkunn.
Nemendur fá innsýn í menningu og samfélag í enskumælandi löndum. Nemendur lesa fjölbreytt efni, horfa á kvikmyndir, þætti og myndbönd og hlusta á tónlist. Námið miðar að því að nemendur þjálfist í enskri tungu og bæti við orðaforða sinn og málskilning. Nemendur eru þjálfaðir í að tjá sig á ensku, á gagnrýnan hátt, bæði í ritun og tali. Kennsluhættir eru fjölbreyttir og áhersla er lögð á skapandi verkefni, sjálfstæð vinnubrögð og frumkvæði nemenda.
Áfanginn er verkefnamiðaður og námsmat því í formi símats.
Horft er á og unnið með kvikmyndir á ensku á fjölbreyttan hátt og er heimur kvikmyndanna skoðaður frá ýmsum sjónarhornum. Unnið er í lotum þar sem fengist er við ólík áhersluatriði. Hugtök sem tengjast menningu og listum ásamt viðfangsefnum kvikmyndanna eru kynnt og unnið með þau. Farið er í bíó og gestir koma í heimsókn. Nemendur vinna fjölbreytt og skapandi verkefni í tengslum við efnið og nemendur og kennari ákveða í sameiningu hvernig námsmati er háttað og á hvaða kvikmyndir er horft. Öll vinna áfangans fer fram á ensku og lögð er áhersla á að efla getu nemenda til að tjá sig með umræðum. Áfanginn er símatsáfangi.
Áfanginn er símatsáfangi.
Í áfanganum læra nemendur um fjárfestingar og þær aðferðir sem beitt er til þess að meta hagkvæmni þeirra. Þá er farið í helstu tegundir verðbréfa, skuldabréfa og hlutabréfa og virðingu þeirra. Kennsluhættir eru í formi fyrirlestra, umræðutíma, dæmatíma og verkefnavinnu. Lögð er áhersla á að nemendur geti nýtt tölvutæknina við lausn verkefna og geti skilað verkefnum á tölvutæku formi. Markmið er að kennsluhættir stuðli að sjálfstæðum vinnubrögðum nemenda. Námsefni áfangans má gróflega skipta í þrennt. 1) Umfjöllun um fjárfestingar og útreikningar tengdir þeim. Nemendur læra að meta núvirði fjárfestinga miðað við gefnar forsendur og í framhaldinu ákvarða hvort fjárfesting sé arðbær eða ekki. 2) Umfjöllun um algengustu tegundir skuldabréfa og útreikningum tengdum þeim. Nemendur læra m.a. um mismunandi greiðsluflæði mismunandi skuldabréfa og hvernig samspil ávöxtunarkröfu og greiðsluflæðis hefur áhrif á markaðsvirði skuldabréfa. 3) Umfjöllun um hlutabréf og kennitölur. Nemendur læra að meta virði hlutafjár miðað við gefnar forsendur og mynda sér skoðun á rekstrar- og fjárhagslegri stöðu fyrirtækis.
Markmið áfangans er að veita nemendum hagnýta færni sem nýtist þeim í framtíðinni. Áhersla er lögð á að nemendur þrói færni sína með verklegum æfingum og raunhæfum verkefnum. Meðal efnis áfangans er samningatækni – þ.e. hvernig ná má betri samningum í mismunandi aðstæðum. Nemendur munu æfa sig í samningaviðræðum og keppa sín á milli um að ná sem bestu niðurstöðum.
Einnig verður fjallað um færni sem nýtist í hinu daglega lífi, svo sem hvernig auka má líkurnar á að fá draumastarfið, framkomu, markmiðasetningu, háttvísi og tímastjórnun. Áfanginn er að hluta persónumiðaður, sem þýðir að hver nemandi vinnur með eigin styrkleika og fær tækifæri til að bæta sig á þeim sviðum sem skipta hann mestu máli.
Í lok áfangans hafa nemendur fengið tækifæri til að þróa færni sína á ýmsum sviðum, sem styrkir stöðu þeirra bæði í atvinnu- og einkalífi.
Byggist á ástundun, verkefnum og umræðum. Áfanginn er próflaus.
Byggt er markvisst á þeirri kunnáttu sem nemendur hafa þegar tileinkað sér. Haldið er áfram að þjálfa nemendur jöfnum höndum í öllum færniþáttum tungumálsins í samræmi við evrópska tungumálarammann. Mikil áhersla er lögð á að auka orðaforða og að vinna markvisst með talað mál ásamt því að æfa hlustun og ritun. Áhersla er lögð á að nemendur geti notað tungumálakunnáttu sína við margvíslegar aðstæður daglegs lífs og að þeir geti aflað sér upplýsinga á sjálfstæðan hátt í gegnum helstu gagnaveitur. Auk þess öðlast nemendur skilning á þjóðlífi, tónlist og matarmenningu Frakka.
Áfanginn er símatsáfangi. Lokaeinkunn fæst með því að nota fjölbreytt námsmat sem endurspeglar markmið áfangans í öllum færniþáttum í samræmi við evrópsku tungumálamöppuna. Lokaeinkunn byggir á mati á virkni og verkefnaskilum þar sem færniþættirnir fjórir lestur, hlustun, tal og ritun eru metnir jöfnum höndum.
Áfanginn felst í því að nemendur mynda hópa, þróa sína eigin vöru og stofna fyrirtæki og reka. Vinna nemenda felst í því að halda utan um allt sem viðkemur fyrirtækinu en þau hafa nokkuð frjálsar hendur um viðfangsefni fyrirtækisins. Við rekstur fyrirtækjanna nota nemendur þá þekkingu, leikni og hæfni sem þeir hafa hlotið í öðrum áföngum sínum svo sem bókfærslu, fjármálum og hagfræði. Áhersla er lögð á sjálfstæð vinnubrögð nemenda og ábyrgð þeirra á eigin námi.
Nemendur taka þátt í keppni Ungra frumkvöðla, sem er keppni sem haldin er meðal framhaldsskólanna. Sigurvegarar keppninnar taka þátt í evrópukeppni Ungra frumkvöðla erlendis. Versló hefur margoft unnið keppnina innanlands á síðustu árum og hefur sigrað evrópukeppnina.
Áfanginn er símatsáfangi þar sem unnið er að rekstri fyrirtækisins alla önnina.
Námskeiðslýsing: Hvað eru peningar? Hvernig urðu þeir til? Hvernig gátu þeir orðið ósýnilegir og birst okkur aðeins sem tölur á skjá? Vorið 2008 kostaði jarðarför í Zimbabwe eina milljón Zimbabwe-dollara. Hvernig getur verðbólga orðið svona rosaleg? Hvers vegna verða regluleg hrun á mörkuðum? Getur þekking á fjármálasögunni hjálpað okkur að sjá fyrir möguleg áföll?
Í námskeiðinu Peningarnir sigra heiminn verður leitast við að svara þessum spurningum og mörgum fleirum. Þar verður sögð sagan af því hvernig fjármálakerfi heimsins eru í lykilhlutverki við framþróun mannlegs samfélags. Fyrirtæki og stofnanir verða heimsótt og gestir munu líta í kennslustundir.
Niall Ferguson: Peningarnir sigra heiminn. Fjármálasaga veraldarinnar og valdir leskaflar.
Í áfanganum verður unnið með forrit frá Adobe. Sérstök áhersla verður lögð á Photoshop og InDesign. Í áfanganum fá nemendur að kynnast grafískri hönnun og ferlinu í kringum hana. Í lok áfangans eiga nemendur að geta unnið með Photoshop við alhliða myndvinnslu og lagfæringar, sett upp bækling í Indesign og útbúið efni fyrir stafræna birtingu og prentun. Áfanginn er góður undirbúningur fyrir þá sem hafa áhuga á grafískri hönnun, auglýsingagerð og meðhöndlun efnis til birtingar. Áfanginn er símatsáfangi þar sem nemendur vinna verkefni yfir önnina. Ekkert lokapróf er í áfanganum.
Verkefnaskil 75% og símat á önninni 25%.
Áfanginn er textílhönnunar- / fatahönnunaráfangi þar sem lögð er áhersla á endurhönnun. Hugmyndin er að gefa gömlum flíkum og hlutum nýtt líf. Nýttar eru fjölbreyttar aðferðir, nemendur læra t.d. að prenta á föt með einföldum hætti og lita og aflita. Nemendur nýta tæki í stafrænni smiðju og læra að nota vinylskera til að búa til límmiða á föt og hluti og prófa að lazerskera í efni. Engar forkröfur er í áfangann, sem þýðir að allir eru velkomnir sem hafa áhuga, það þarf ekki að hafa lært eitthvað í sjónlistum áður.
Áfanginn er verklegur símatsáfangi þar sem nemendur vinna bæði stór og smá verkefni og er áhugi, vinnuframlag og afurð það sem stuðst er við í mati verkefna.
Fjallað verður um ævi og störf Halldórs Laxness. Lesin verða brot úr verkum hans, horft á heimildarmyndir og kvikmyndir byggðar á verkum og ævi Halldórs. Gestafyrirlesarar koma og ræða um skáldið og staðir heimsóttir er tengjast ævi þess. Nemendur velja sér eitt verk eftir Halldór af bókalista, lesa það sjálfstætt á tilteknum tíma og gera kennara grein fyrir efni þeirra á þann hátt sem nemanda hentar best.
Nemendur skila alls þremur verkefnum yfir önnina og ákveða sjálfir hvers eðlis þau verkefni eru. Ekkert lokapróf er í áfanganum.
Í áfanganum öðlast nemendur þekkingu á grunnstoðum lífsins og hvaða þættir í daglegu lífi okkar skipta máli, það eru svefn, hreyfing, næring, og félagsleg heilsa. Góður svefn, næringargildi matvæla og áhrif þeirra, áhugmál varðandi eigin hreyfingu og heilbrigði, líkamsbeiting og markmiðasetning er meðal annars farið yfir. Hvaða áhrif lífstíll hefur á ferðalög, fjölskyldulífið, félagslíf og að lifa innihaldsríku og góðu lífi og hvernig markmiðasetning getur hjálpað til að ná fram því besta í lífi hvers og eins.
Símatsáfangi. Mæting og virkni í tímum. Áhugaverð smærri verkefni tengd eigin venjum og heilbrigði.
Kyn er grundvallarstærð í tilverunni og eitt af því sem skapar margbreytileika mannlegs samfélags rétt eins og kynhneigð, þjóðerni, aldur, stétt, fötlun og fleiri félagslegir áhrifaþættir. Fjallað verður um kyn, kyngervi, staðalmyndir og fleira. Nemendur beina sjónum sínum að eigin samfélagi og skoða tímarit, kvikmyndir, stjórnmál og fjölmiðla út frá hugmyndum kynjafræðinnar.
Byggist á verkefnum, umræðum og lokaverkefni. Áfanginn er próflaus.
Í áfanganum er unnið með mismunandi aðferðir sjónlista t.d. olíumálun, módelteikningu, módel í leir, línuteikning færð yfir í laserskera og fleira. Nemendur læra að nota mismunandi verkfæri til listsköpunar. Samtímalist verður skoðuð og nýtt sem innblástur.
Markmið áfangans er að kynna fyrir nemendum hversu fjölbreyttar aðferðir er hægt að nota til listsköpunar og hvernig það getur gefir aðra sýn á umhverfið.
Engar forkröfur er í áfangann, sem þýðir að allir eru velkomnir sem hafa áhuga, það þarf ekki að hafa lært eitthvað í sjónlistum áður.
Í þessum áfanga er fjallað um lykilhugtök erfðafræðinnar, fósturfræði og þróunarfræði. Litningar eru teknir til umfjöllunar, breytingar og gallar á þeim, prótínmyndun, erfðamynstur lífvera og tíðni og jafnvægi gena í ólíkum stofnum lífvera rætt og líkur fundnar út. Einnig er fjallað um helstu aðferðir í erfðarannsóknum og erfðatækni og verklegar æfingar gerðar samhliða því. Áfanginn er byggður upp á fyrirlestrum, einstaklings- og hópavinnu og verklegum æfingum.
Efni áfangans er til inntökuprófs í læknisfræði og sjúkraþjálfun við HÍ.
Hlutapróf, verkefnavinna og skýrslugerð.
Í námskeiðinu er lögð áhersla á að nemendur fái innsýn í réttarreglurnar og geri sér grein fyrir hvernig þær verka á samskipti manna. Umfjöllunarefnið er mannréttindi, störf löggjafans og framkvæmdarvaldshafa. Einnig er vikið sérstaklega að refsirétti og ýmsar tegundir afbrota teknar til skoðunar. Þjóðaréttur er verður sömuleiðis til umfjöllunar sem og helstu réttarreglur um verslun og viðskipti og þær reglur sem gilda um hjúskap, óvígða sambúð, börn og erfðir.
Lögð er rík áhersla á sjálfstæð og vönduð vinnubrögð og að nemendur öðlist færni í meðferð heimilda, þannig að þeir geti beitt tilteknum hugtökum varðandi lausnir á lögfræðilegum álitaefnum og rökstutt mál sitt í tengslum við það.
Markmiðið með námskeiðinu er að nemendur öðlist skilning á helstu réttarreglum sem geta gagnast þeim í frekara námi og fjölbreytilegum störfum á vettvangi íslensks athafna- og fjármálalífs, svo og í mikilvægu hlutverki sínu sem góðir þjóðfélagsþegnar.
Símat. Kennslan byggist hvort tveggja á fyrirlestrum og verkefnavinnu. Nemendur leysa umfangsmikið sakamál, sem þarf að undirbúa rækilega og flytja fyrir dómi þar sem þeir bregða sér í hlutverk dómara, verjenda, sakborninga, lögreglu og vitna.
Áfanginn er framhaldsáfangi í markaðsfræði. Byggt er á þekkingu úr undanfara (MARK2HN05) og fjallað nánar um markaðssetningu í nútímasamfélagi. Sérstök áhersla er lögð á stafræna markaðssetningu og markaðsrannsóknir. Nemendur vinna fjölbreytt verkefni þar sem meðal annars er unnið með texta, vefsíður, samfélagsmiðla, markaðsáætlanir og önnur markaðstengd verkefni.
Áfanginn er byggður upp á símati.
Áherslur áfangans eru tvíþættar. Annars vegar verður farið í grundvallar hugtök er snúa að kvikmyndafræði sem er þverfaglegt fag þar sem blandast fræði og listir. Farið verður yfir þau atriði sem gera okkur kleift að greina og njóta kvikmynda á dýpri máta. Hins vegar verður farið í sögu kvikmyndagerðar og horft á nokkrar af lykilmyndum kvikmyndasögunnar til þess að átta okkur á þeim nýjungum sem koma fram í tækni og frásagnarmáta á hverju skeiði. Farið verður í bíó ásamt því að horfa á kvikmyndir í kennslustundum og þær ræddar frá ýmsum sjónarhornum.
Áfanginn er símatsáfangi með fjölbreyttum verkefnum er snúa að greiningu kvikmynda.
Í áfanganum fá nemendur innsýn inn í heim vestrænnar listar og listsköpunar frá fornöld til dagsins í dag. Einkum er lögð áhersla á myndlist, byggingarlist og höggmyndalist. Fjallað verður um þróun listarinnar og helstu listastefnur. Skoðuð verða verk eftir helstu listamenn sögunnar, t.d. Leonardo da Vinci, Michelangelo, Vincent Van Gogh, Pablo Picasso, Fridu Kahlo og marga fleiri. Rík áhersla er lögð á að fara í vettvangsferðir á listasöfn, gallerí, um miðbæ Reykjavíkur og í merkilegar byggingar. Nemendur eru virkjaðir til að rýna sjálfir í og greina listaverkin sem eru til umfjöllunar. Markmið áfangans eru að nemendur kynnist þróun vestrænnar listsköpunar frá fornöld til okkar daga, þeir þekki og geti greint helstu listastefnur, einkenni þeirra og þann jarðveg sem þær spruttu úr, öðlist grunnþekkingu í að greina ýmis tákn og merkingu út úr listaverkum og geti metið þau á gagnrýninn og sjálfstæðan hátt og að sóttar séu sýningar og listasöfn m.a. til að kynnast listum líðandi stundar.
Áfanginn er símatsáfangi. Nemendur vinna nokkur stærri verkefni, svo sem kynningar og skýrslu. Að öðru leyti samanstendur námsmatið af minni verkefnum úr efni áfangans og mætingu og virkni nemenda í tímum. Ekkert lokapróf er haldið.
Saga nasismans, gyðinga og útrýmingar á hendur þeim verður rakin í máli og myndum, einnig verður fjallað um stöðu ýmissa hópa í Þýskalandi nasismans og ofsóknir á hendur þeim. Sérstök áhersla er á útrýmingabúðirnar í Auschwitz og þau voðaverk sem þar voru framin og þá eru eftirmálum helfararinnar gerð skil. Lesnar verða valdar greinar um efnið ásamt því sem heimildamyndir og önnur miðlunarform verða notuð eftir fremsta megni.
Áfanginn er símatsáfangi þar sem nemendur vinna ýmis verkefni yfir önnina. Ekkert lokapróf er í áfanganum.
Í áfanganum fá nemendur innsýn inn í heim fornaldarinnar, vöggu vestræns lýðræðis. Nemendur kynnast sögufrægum persónum og atburðum. Hver var Arkimedes? Eða Sókrates, sem aldrei skrifaði neitt en er samt ein þekktasta persóna sögunnar? Hvað var hann að jappa? Farið verður í fótspor Alexanders mikla sem hafði lagt undir sig stærstan hluta Asíu þegar hann var aðeins 30 ára. Hannibal og fílarnir sem fóru yfir Alpana og hver var Sesar sem sagði í lauslegri þýðingu: Og þú líka Brútus bróðir minn, og dó. Og Kleópatra? Var hún útsmoginn stjórnmálamaður sem hugsaði fyrst og fremst um sig? Af hverju hefur hún orðið fræg?
Af hverju er Hermes guð Verslunarskólanema? Hvað voru hinir guðirnir alltaf að bauka á jörðinni?
Við kynnumst alls kyns orðum sem eiga rætur að rekja til fornaldar og við notum í dag.
Markmið áfangans er að nemendur kynnist þessum sögufrægu persónum í gegnum skemmtilegar frumheimildir og kvikmyndir verða sýndar.
Áfanginn er símatsáfangi. Nemendur vinna nokkur stór verkefni, svo sem kynningar og lesa frumheimildir og horfa á kvikmyndir.
Áfanginn er grunnáfangi í sálfræði. Nemendur kynnast fræðigreininni sálfræði, eðli hennar, sögu og þróun. Helstu sálfræðistefnur, undirgreinar og starfssvið sálfræðinga verða skoðuð sem og hagnýtt gildi sálfræði í daglegu lífi. Farið verður í tegundir náms og minnis. Fjallað verður um geðheilsu og helstu geð- og persónuleikaraskanir skoðaðar. Þá verður farið í hvað tilfinningar eru, streituhugtakið og hvernig persónuleiki fólks mótast. Loks eru helstu rannsóknaraðferðir kynntar og nemendur framkvæma rannsókn. Kennslan er með fjölbreyttu sniði, fyrirlestrar kennara, umræður og verkefni.
Í áfanganum fá nemendur frekari innsýn í þroskasálfræði og félagssálfræði. Fjallað verður um þroskaferli barna og unglinga, eins og kynþroska, líkams- og hreyfiþroska, vitsmunaþroska, tilfinninga- og félagsþroska. Einnig verður fjallað um ýmis vandamál barna og unglinga eins og geð- og þroskaraskanir, námsvandamál, streitu og álag. Þá verður fjallað um félagslega hegðun og viðhorf fólks, hvernig við skynjum annað fólk, tengjumst því og höfum áhrif á það. Fjallað verður sérstaklega um fordóma, staðalmyndir, sjálfsmynd, viðhorf, fortölur, hópþrýsting og hóphegðun. Farið verður í þær leiðir sem fólk notar þegar það metur annað fólk, fyrstu kynni og náin sambönd. Einnig verður fjallað um hvaða lögmál sálfræðinnar eru að baki auglýsingasálfræði og hafa áhrif á auglýsingar. Að lokum verður farið í valin viðfangsefni í vinnusálfræði, afbrotasálfræði og íþróttasálfræði.
SÁLF2GR05.
Skáklistin á sér veigamikinn sess í íslenskri menningu og má rekja þá sögu alla leið til þjóðveldisins á 10. öld. Í áfanganum læra nemendur um sögu skáklistarinnar almennt, undirstöðuatriði hennar og athyglisverðustu hliðar. Áfanginn er ætlaður byrjendum jafnt sem lengra komnum en unnið er einstaklingsmiðað út frá getu hvers og eins. Áhersla er lögð á raunhæf verkefni undir handleiðslu kennara en ekki síður þjálfun með taflmennsku innbyrðis í hópnum. Hluti áfangans fer fram í gegnum vefinn www.chess.com en þar er fjölbreytt umhverfi sem býður upp á ýmis konar þjálfun og keppnisform. Vettvangsferðir verða farnar ef aðstæður leyfa, t.d. á Fischersetrið á Selfossi. Nemendum gefst einnig kostur að keppa fyrir hönd skólans í skákkeppni framhaldsskólanna og jafnvel etja kappi við þrautþjálfað stórlið kennara.
Byggt er markvisst á þeirri kunnáttu sem nemendur hafa þegar tileinkað sér. Haldið er áfram að þjálfa nemendur jöfnum höndum í öllum færniþáttum tungumálsins í samræmi við evrópska tungumálarammann. Áhersla er lögð á að auka orðaforða og að vinna markvisst með talað mál. Áhersla er lögð á að nemendur geti notað tungumálakunnáttu sína við margvíslegar aðstæður daglegs lífs og að þeir geti aflað sér upplýsinga á sjálfstæðan hátt í gegnum helstu gagnaveitur.
Áfanginn er símatsáfangi. Lokaeinkunn færst með því að nota fjölbreytt námsmat sem endurspeglar markmið áfangans í öllum færniþáttum í samræmi við evrópsku tungumálamöppuna. Lokaeinkunn byggir á mati á virkni og verkefnaskilum þar sem færniþættirnir fjórir lestur, hlustun, tal og ritun eru metnir jöfnum höndum.
Áfanginn er inngangur að stjórnmálafræði sem fræðigrein en einkum verða þrjú meginhugtök notuð sem útgangspunktar. Lýðræði, jafnrétti og mannréttindi. Farið er ítarlega í hugmyndir og kenningar um lýðræði. Lýðræði á Íslandi og íslenska stjórnkerfið tekið sérstaklega fyrir. Jafnréttishugtakið skoðað frá mörgum sjónarhornum, t.d. út frá hugtökum á borð við kyn, kynhneigð, kynþáttur o.fl. Unnið með mannréttindahugtakið í tenglsum við jafnrétti. Kennsluaðferðir eru í meginatriðum þrenns konar. Í fyrsta lagi eru fyrirlestrar kennara þar sem námsefnið er reifað og hugtök útskýrð. Þá eru umræður og loks verkefnavinna nemenda; úr námsefninu sjálfu eða öðru sem því tengist. Nemendur kynna sér sjálfir ýmislegt efni sem tiltækt er á netinu og vinna verkefni, jafnt einstaklings- sem hópaverkefni. Gert er ráð fyrir að nemendur sæki kennslustundir og taki virkan þátt í umræðum og verkefnavinnu.
Símat sem byggir m.a. á verkefnum.
Nemendur kynnast meðal annars. a) forritun og rafeindabúnaði, t.d. Arduino eða Micro:bit, þar sem þeir smíða eigin tæknilausnir, m.a. verkefni sem tengjast orkunýtingu, skynjurum og umhverfisvöktun; b) tækninýjungum í vísindum, svo sem sjálfvirkni, gervigreind, endurnýjanlegri tækni og snjalllausnum sem geta stuðlað að minni sóun eða betri nýtingu auðlinda; c) sjálfbærum hönnunar- og þróunarferlum, þar sem nemendur læra að hanna verkefni með umhverfissjónarmið í huga, velja efni af ábyrgð og skoða lífsferil vöru; d) umhverfisáhrifum, bæði jákvæðum og neikvæðum; hvernig tæknin getur hjálpað til við að leysa loftslagsáskoranir; e) samvinnu og frumkvöðlahugsun, þar sem nemendur móta eigin verkefni sem byggja á tæknilausnum við raunverulegar áskoranir í samfélaginu og náttúrunni.
Efni áfangans er margþætt. Breiðbogaföll og þrepasannanir, tvinntölureikningur, lausnir annars stigs línulegra diffurjafna með rauntölustuðlum, fylkjareikningur og Taylor margliður. Hvern þátt má túlka sem kynningu þannig að nemendur „hafi séð” efnið þegar á næsta þrep kemur. Kennslan fer jöfnum höndum fram með fyrirlestrum kennara þar sem nýtt efni er kynnt og útskýrt og með vinnu nemenda. Gerðar eru kröfur um að nemendur vinni verkefni og standi skil á þeim annaðhvort í kennslustund eða með því að skila verkefnum skriflega.
Áfanginn er símatsáfangi og er mat byggt á verkefnum sem nemendur vinna í tímum, skyndiprófum og virkni í tímum.
Efni áfangans er ákveðið og óákveðið heildi, notkun heildunnar og heildunaraðferðir. Einfaldar diffurjöfnur, diffurjöfnur með aðskilanlegum breytistærðum, línulegar diffurjöfnur á fyrsta stigi og sérlausn diffurjafna. Fylki og grunnatriði fylkjareiknings. Kennslan fer jöfnum höndum fram með fyrirlestrum kennara þar sem nýtt efni er kynnt og útskýrt og vinnu nemenda. Gerðar eru kröfur um að nemendur vinni verkefni heima og standi skil á þeim annað hvort í kennslustund eða með því að skila verkefnum skriflega. Nemendur þurfa ekki að geta sannað reglurnar.
Áfanginn er lokaprófsáfangi með 70% lokaprófi, 20% hlutaprófum og 10% ástundun sem er byggð á verkefnum sem nemendur vinna og virkni í tímum.
Efni áfangans er margþætt en meginviðfangsefnið eru þrautalausnir meðal annars í rúmfræði, talnafræði og fléttufræði, þau svið stærðfræðinnar sem gjarnan birtast í stærðfræðikeppnum. Kennslan byggist á sjálfstæðri vinnu nemenda í litlum hópum en kennari kynnir helstu aðferðir hvers námsþáttar, einna helst með sýnidæmum. Gerðar eru kröfur um að nemendur nýti kennslustundir vel í sjálfstæðri vinnu og geti síðan kynnt einhverjar af lausnum sínum stuttlega fyrir samnemendum sínum. Einna helst verður notast við bókina The Art and Craft of Problem Solving eftir Paul Zeits, en nokkur eintök eru til á bókasafninu og ekki er ætlast til að nemendur kaupi hana.
Áfanginn er símatsáfangi og er mat meðal annars byggt á vinnu nemenda í tímum, kynningum á þrautalausnum og lausnaraðferðum auk verkefna sem unnin eru í tíma og heima. Það verða engin skrifleg próf. Ekki er gerð krafa á að nemendur taki þátt í stærðfræðikeppni framhaldsskólanna.
Efni áfangans er uppruni, þróun og endalok alheimsins, vetrarbrauta, stjarna, reikistjarna og lífs í alheimi. Ekki er reiknað með sérstakri þekkingu í raungreinum, en í námskeiðinu er farið nokkuð ítarlega og fræðilega í hlutina og ekki um gefins einingar að ræða. Námskeiðið hentar þeim sem vilja skilja alheiminn og hið kosmíska samhengi mannlegrar tilveru. Kennslubók er á íslensku.
Ekki er lokapróf, en námsmat byggist á tímaprófum og ritgerð. Farið verður í stjörnuskoðunarferð út fyrir borgina og stjörnuljósmyndun prófuð ef áhugi er á því.
Nemendur fá undirstöðuþjálfun í forritun í forritunarmálinu Python. Nemendur læra að skrifa hefðbundin forrit sem keyra í textaham og eru oft með stærðfræðitengdum lausnum.
Einnig verður skoðað efni um tölvufræði s.s. sögu tölvutækninnar og forritunarmála, kíkt verður á efni um byggingu og helstu vélarhluta tölvunnar, minni og gögn, ásamt sambandi tölvunnar við umheiminn.
Kennsla mun byggjast á innlögn kennara og sjálfstæðri verkefnavinnu nemenda.
Áfanginn er mjög góður undirbúningur fyrir alla þá forritun og rökhugsun sem er mikilvægur hluti af mörgum tæknigreinum háskólanna s.s. verkfræði, stærðfræði, tölvunarfræði og fleiri tengdum greinum. Ef aðstæður leyfa verður skroppið í heimsókn í háskóla þar sem nemendur fá kynningu á námi í tölvunar-, verk- og tæknifræði.
Símat á önninni og verkefnaskil 100%.
Hér takast nemendur á við flóknari forrit en í grunnáfanga í forritun. Nemendur greina, hanna, og forrita forrit með hlutbundnum aðferðum. Vinnsluklasar og -föll eru notuð í uppbyggingu forrita. Farið verður dýpra í forrit þar sem lausnirnar krefjast texta- og fylkjavinnslu. Áhersla er lögð á vel skipulögð og vönduð vinnubrögð við mótun og framsetningu forrita.
Áfanginn er mjög góður undirbúningur fyrir fyrir alla þá forritun og rökhugsun sem er mikilvægur hluti af mörgum tæknigreinum háskólanna s.s. verkfræði, stærðfræði, tölvunarfræði og fleiri tengdum greinum.
Áfanginn miðar að því að auka skilning nemandans á helstu kenningum hagfræðinnar og starfsemi
þjóðarbúsins. Samband sparnaðar og fjárfestinga verður skoðað, hagvaxtarfræði kynnt og helstu
kenningar er varða þróun hagkerfa.
Áhersla er lögð á fræðilegt inntak og hagnýtt gildi námsefnisins með því að tengja sem mest við
þau efnahagsmál sem eru efst á baugi á Íslandi sem og erlendis. Áhersla er lögð á almennar
þjóðhagsstærðir og að nemendur öðlist þá hæfni að leita sér upplýsinga um hagfræðilega tengd
málefni. Kennslan er byggð á fyrirlestrum, verkefnavinnu og umræðutímum. Lesefni er að mestu á ensku og er lögð áhersla á að nemandinn geti skilið og tileinkað sér hugtök og efnisatriði á ensku sem og íslensku.
Byggt er markvisst á þeirri kunnáttu sem nemendur hafa þegar tileinkað sér. Haldið er áfram að þjálfa nemendur jöfnum höndum í öllum færniþáttum tungumálsins í samræmi við evrópska tungumálarammann. Áhersla er lögð á að auka orðaforða og að vinna markvisst með talað mál. Áhersla er lögð á að nemendur geti notað tungumálakunnáttu sína við margvíslegar aðstæður daglegs lífs og að þeir geti aflað sér upplýsinga á sjálfstæðan hátt í gegnum helstu gagnaveitur. Auk þess öðlast nemendur skilning á þjóðlífi með því að fara sérstaklega í sögu, landafræði og menningu landsins.
Áfanginn er símatsáfangi. Lokaeinkunn færst með því að nota fjölbreytt námsmat sem endurspeglar markmið áfangans í öllum færniþáttum í samræmi við evrópsku tungumálamöppuna. Lokaeinkunn byggir á mati á virkni og verkefnaskilum þar sem færniþættirnir fjórir lestur, hlustun, tal og ritun eru metnir jöfnum hönd