Starfsfólk VÍ
Fréttir frá alþjóðasamstarfinu
Komdu í heimsókn á bókasafnið
Fjarnám
Tímalínan rekur helstu atburði og áfanga í sögu skólans, allt frá brautryðjandi námsleiðum, félagslífi sem hefur skapað óteljandi minningar, til nýsköpunar í menntun og vaxandi fjölbreytni í námsframboði.
Danska þingið samþykkti árið 1854 lög sem veittu Íslendingum fullt verslunarfrelsi. Verslunarstéttin minntist þessara tímamóta með veglegu samsæti 15. apríl 1904. Þar flutti Brynjólfur H. Bjarnason kaupmaður ræðu og fjallaði um mikilvægi þess að stofnaður yrði verslunarskóli á Íslandi. Tilraunir höfðu verið gerðar til að koma á fót slíkum skóla en þær höfðu ekki heppnast sem skyldi. Verslunarmannafélag Reykjavíkur tók skólamálið upp á sína arma og fékk Kaupmannafélag Reykjavíkur til liðs við sig. Þetta bar árangur.
Verzlunarskóli Íslands (VÍ) tók til starfa og Ólafur G. Eyjólfsson, verslunarmaður, var ráðinn skólastjóri. Fyrsta skólaárið var skólinn til húsa í Vinaminni við Mjóstræti 3. 47 nemendur hófu nám og skiptist skólinn í tvær deildir, undirbúningsdeild og neðri deild. Að auki hófu sjö nemendur nám í tungumáladeild skólans sem aðeins var starfrækt einn vetur. Deildaskiptingin var gerða eftir kunnáttu nemenda, með sérstakri áherslu á reikningskunnáttu. Enginn nemandi þótti hæfur til að setjast í efri deild og var henni því ekki komið á laggirnar fyrr en árið 1906.
Verzlunarskólinn flutti í Melsteðshús, við Austurstræti, en var þar aðeins einn vetur. Sama ár hóf efri deild skólans, göngu sína.
Fyrsti hópur nemenda útskrifaðist. Stofnun Verzlunarskóla Íslands hafði jákvæð áhrif á jafnréttisbaráttu í landinu því að bæði stúlkur og piltar höfðu jafnan aðgang að skólanum og strax í upphafi skapaðist hefð fyrir því að stúlkur stunduðu nám við skólann og gæfu piltunum þar ekkert eftir. Fyrsti dúx skólans var Lovísa Ágústsdóttir Fjeldsted, sem útskrifaðist árið 1907. Stofnun skólans var einnig mikilvægur liður í sjálfstæðisbaráttu Íslendinga, þar sem aukin menntun í verslun og skrifstofustörfum gerði þjóðinni kleift að reka eigin verslun án utanaðkomandi aðstoðar. Haustið 1907 var skólinn til húsa í bakhúsi Thomsen-magasíns við Kolasund 1.
Málfundafélag Verzlunarskóla Íslands (M.F.V.Í.) og skólablaðið Viljinn voru stofnuð. Félagslíf nemenda var með líflegra móti samanborið við aðra skóla á þessum tíma. Reglulega voru haldnar dansæfingar og fjölsóttur jóladansleikur.
Fyrsta starfsárið var aðeins kennt milli klukkan 8 og 10 á morgnana og var það gert til þess að nemendur gætu verið í fullri vinnu með náminu. Fljótlega þótti ljóst að námið yrði að hafa forgang og næstu árin lengdist daglegur skólatími. Skólaárið 1911–1912 var hann 6–7 klukkustundir á dag hjá efri deild og fjórar klukkustundir hjá neðri deild.
Skólinn flutti í betra húsnæði við Vesturgötu 10A og var þar til ársins 1931.
Jón Sívertsen tók við sem skólastjóri.
Verslunarráð Íslands tók við yfirstjórn Verzlunarskólans.
Undir lok þriðja áratugarins fór Verzlunarskóli Íslands að ganga undir gælunafninu Versló. Veturinn 1927-28 virtist það vera orðin almenn venja meðal nemenda að tala um Versló í stað þess að segja Verzlunarskólinn.
Skólinn flutti að Grundarstíg og Vilhjálmur Þ. Gíslason tók við sem skólastjóri. Við flutninginn að Grundarstíg breyttist margt. Fram að því höfðu nemendur skólans aldrei verið fleiri en 100. Þegar hart var í ári fjárhagslega, t.d. á krepputímum fyrri heimsstyrjaldar, voru nemendur skólans aðeins rúmlega 50 talsins. Við flutninginn og með nýjum skólastjóra fór smám saman að komast betri mynd á félagslíf nemenda. Sama ár fól Verslunarráð Íslands sérstakri skólanefnd, sem skipuð var fulltrúum úr viðskiptalífinu, stjórn skólans.
Fyrsta nemendamótið var haldið að frumkvæði Vilhjálms Þ. Gíslasonar skólastjóra.
Verzlunarskólablaðið kom út í fyrsta skipti og framhaldsdeild tók til starfa við skólann og var hún sérstaklega hugsuð fyrir nemendur sem vildu stunda verslunarstörf samhliða námi.
Ný skipulagsskrá var samþykkt þar sem skólanefnd tók formlega við stjórn skólans.
Nýútskrifaðir verslunarprófsmenn gáfu Verzlunarskólanum skólafánann árið 1937. Á honum er merki skólans, sem hafði tiltölulega nýverið verið tekið í notkun og sýnir staf með tveimur slöngum sem vefja sig utan um hann. Tákn þetta á rætur sínar í grískri og rómverskri goðafræði og tengist guðunum Hermes og Merkúr, verndurum kaupmanna og ferðamanna.
Nemendasamband Verzlunarskóla Íslands var stofnað með það markmið að efla vináttu og samkennd brautskráðra nemenda. Nemendasambandið hefur frá upphafi staðið fyrir árlegri samkomu þar sem afmælisárgangar skólans koma saman og skemmta sér.
Lærdómsdeild VÍ var stofnuð með það markmið að veita nemendum möguleika á að ljúka stúdentsprófi. Með tilkomu Lærdómsdeildarinnar fékk skólinn á sig metnaðarfyllra yfirbragð.
Fyrsti kennari skólans fékk fastráðningu, en fram að því höfðu allir kennarar verið stundakennarar. Sama ár var Kennarafélag Verzlunarskólans stofnað. Á næstu árum voru gerðar ýmsar endurbætur á kennslunni.
Fyrstu stúdentarnir útskrifuðust frá Verzlunarskólanum. Í útskriftarhópnum voru sjö piltar. Árið eftir útskrifuðust 15 nemendur, 12 piltar og þrjár stúlkur.
Ýmsar hefðir fylgdu Peysufatadeginum í Verzlunarskólanum. Dagsetning hans var aldrei ákveðin fyrirfram, heldur mættu nemendur einn daginn í skólann og fengu þá tilkynningu um að dagurinn væri runninn upp. Nemendur héldu þá heim til sín til að klæða sig í viðeigandi skrúða og safnaðist hópurinn svo saman og hélt niður í bæ. Um kvöldið var aftur komið saman í skólanum þar sem stúlkurnar höfðu undirbúið veglega veislu og dansað var og skemmt sér fram eftir kvöldi.
Dr. Jón Gíslason tók við stöðu skólastjóra og lagði hann mikla áherslu á að gera skólann nútímalegan og vel tækjum búinn. Dr. Jón lagði einnig mikið upp úr því að kynna sér verslunarskóla erlendis og tók kennara með sér á ráðstefnur svo að þeir gætu kynnt sér nýjustu kennslutækni. Samhliða því sem námið varð öflugra efldist félagslíf nemenda einnig. Ýmsir klúbbar voru stofnaðir í skólanum, s.s. kvikmyndaklúbbur og radíóklúbbur. Dansleikir voru vel sóttir og útgáfa skólablaðanna efldist.
Aðbúnaður nemenda batnaði enn frekar þegar fyrsti áfangi að nýju skólahúsnæði við Þingholtsstræti var tekinn í notkun.
Verzlunarskólinn eignaðist sitt þriðja hús, vélritunarhúsið við Hellusund. Þá voru nemendur í verslunar- og lærdómsdeild skólans orðnir 483. Kennarar við skólann voru 33. Mjög misjafnt var milli árganga hver hlutföllin voru milli pilta og stúlkna í skólanum. Árið 1957 voru til að mynda aðeins 16 stúlkur í 4. bekk en 50 piltar, en árið 1960 var kynjahlutfallið nokkuð jafnt, 34 stúlkur og 36 piltar. Á síðustu fjórum árum 6. áratugarins útskrifuðust alls 289 nemendur með verslunarpróf. Í þeim hópi voru 99 stúlkur og 190 piltar.
Árið 1967 var Nemendafélag Verzlunarskóla Íslands (NFVÍ) stofnað. Í stjórn NFVÍ sátu fimm einstaklingar: forseti, féhirðir, formaður MFVÍ, formaður Skemmtinefndar og ritstjóri Viljans. Auk þeirra voru tveir meðstjórnendur í stjórninni, það er formenn Listafélagsins og Klúbbasambandsins.
Brautaskipting var tekin upp í fyrsta skipti í Verzlunarskólanum. Lærdómsdeild var þá skipt í hagfræðideild og máladeild.
Þorvarður Elíasson tók við stöðu skólastjóra. Á næstu árum voru gerðar töluverðar breytingar á námi við skólann.
Kennsla í tölvufræði hófst við skólann.
Ákvörðun var tekin um að reisa nýtt húsnæði fyrir skólann á óbyggðu svæði við Ofanleiti í Reykjavík
Verslunarmenntadeild tók til starfa fyrir nemendur sem höfðu lokið verslunarprófi en ekki náð tilskilinni lágmarkseinkunn til að komast í Lærdómsdeild. Sama ár hófust framkvæmdir við byggingu skólahúsnæðis við Ofanleiti.
Stærðfræðideild Verzlunarskólans var komið á laggirnar.
Í byrjun árs flutti Verzlunarskólinn úr húsnæði sínu við Grundarstíg, Hellusund og Þingholtsstræti í nýtt húsnæði við Ofanleiti 1. Skólinn hafði aldrei áður verið í húsnæði sem sérstaklega hafði verið hannað sem skólahúsnæði. Viðbrigðin voru því mikil og aðstaða bæði nemenda og kennara stórbatnaði. Sama ár gekk bókasafn skólans í endurnýjun lífdaga og nemendur fengu mjög góða lesaðstöðu í skólanum. Sama ár hóf Öldungadeild VÍ starfsemi sína og starfaði til ársins 1997.
Tölvuháskóli Verzlunarskólans, TVÍ, tók til starfa en hann var upphafið að Viðskiptaháskólanum sem síðar varð Háskóli Reykjavíkur. Um haustið 1988 voru 927 nemendur innritaðir í Verzlunarskólann og 869 stóðust próf um vorið.
Ný brautaskipting var tekin upp og gátu nemendur nú valið milli alþjóðadeildar og viðskiptadeildar auk þeirra þriggja deilda sem áður höfðu verið starfræktar.
Tölvu- og upplýsingabraut varð hluti af námsframboði skólans.
Um haustið voru nemendur orðnir 1084, þar af 623 stúlkur og 461 piltur. Kennarar við skólann voru þá 83.
Nýtt brautarkerfi var innleitt í Verzlunarskólanum.
Sölvi Sveinsson hóf störf sem skólastjóri Verzlunarskólans.
Haustið 2005 fór fjarnám af stað við Verzlunarskóla Íslands af fullum krafti. Sigurlaug Kristmannsdóttir, kennslustjóri fjarnáms hafði umsjón með fjarnáminu. Í desember 2006 var fyrsti fjarnemandinn, Þórhallur Vigfússon útskrifaður með verslunarpróf frá Verzlunarskóla Íslands. Þórhallur hóf nám haustið 2005 og lauk tilskildum áföngum til verslunarprófs á haustönn 2006.
Ingi Ólafsson hóf störf við Verzlunarskólann árið 1989 sem kennari. Árið 2000 var hann ráðinn sem aðstoðarskólastjóri þar til hann tók við starfi skólastjóra árið 2007.
Um vorið var í fyrsta sinn innritað í skólann samkvæmt nýju skipulagi þriggja ára náms til stúdentsprófs. Boðið var upp á fjórar ólíkar brautir með mismunandi línum. Námið var sett upp sem 207 framhaldsskólaeiningar og lauk með stúdentsprófi á þriðja þrepi.
Verzlunarskóli Íslands hóf að bjóða upp á nám í NGK (Norður Atlantshafsbekkurinn) frá og með skólaárinu 2019-2020 sem hluta af tilraunaverkefni í samstarfi við þrjá aðra skóla: Gribskov Gymnasium í Danmörku, GUX Sisimiut á Grænlandi og Miðnám á Kambsdali í Færeyjum. Verkefnið felur í sér að stofna einn alþjóðlegan bekk þar sem um 7 nemendur frá hverju landi fyrir sig sækja nám saman. Þeir stunda nám í hverju landi á mismunandi tímabilum – fyrst í Danmörku, síðan í Færeyjum og á Íslandi, og loks á Grænlandi. Námið fer fram samkvæmt danskri námskrá, og stúdentsprófið veitir sömu réttindi og próf frá dönskum framhaldsskóla.
Verzlunarskóli Íslands fékk sinn fyrsta grænfána afhentan þann 29. apríl síðastliðinn. Grænfáninn er viðurkenning sem er veitt skólum sem hafa staðist kröfur sem byggja á alþjóðlegum stöðlum verkefnisins, Skólar á grænni grein.
Verzlunarskólinn hóf að bjóða upp á fagnám fyrir starfandi verslunarfólk í samstarfi við Starfsmenntasjóð verslunar- og skrifstofufólks. Námið var 90 einingar og byggðist á blöndu af fjarnámi og vinnustaðanámi í fyrirtækjum.
Á meðan COVID-19 faraldurinn stóð yfir var skólastarf í Verzlunarskóla Íslands, eins og annars staðar, mjög takmarkað og aðlagað að sóttvarnarreglum. Kennsla fór að mestu leyti fram í fjarnámi með stafrænum lausnum eins og Teams. Hólfaskipting var notuð þegar nemendur komu í skólann, grímuskylda var viðhöfð á tímabilum og mikil áhersla lögð á sóttvarnir. Félagslíf skólans var lítið sem hafði mikil áhrif á bæði félagslega og námslega upplifun nemenda.
Í kjölfar aukinnar umfjöllunar um andlega heilsu var sálfræðingur ráðinn til starfa við skólann til að stuðla að vellíðan og velferð nemenda.
Verzlunarskólinn fékk jafnlaunavottun, markmið jafnlaunavottunar er að vinna gegn kynbundnum launamun og stuðla að launajafnrétti kynjanna á vinnumarkaði.
Verzlunarskólinn sigraði úrslitaviðureign Gettu betur gegn Kvennaskólanum í Reykjavík með 31 stigum gegn 17. Í liði Verzló voru þau Sigurbjörg Guðmundsdóttir, Eiríkur Kúld Viktorsson og Gabríel Máni Ómarsson.
Guðrún Inga Sívertsen var ráðin í starf skólastjóra. Hún var fyrsta konan sem gegnir starfi skólastjóra Verzlunarskólans og jafnframt fyrsti verzlingurinn í því starfi.
Í anda jafnréttissjónarmiða og umræðu um jafna stöðu kynjanna í samfélaginu, og þá sérstaklega stöðu drengja í skólakerfinu o.fl., var ákveðið að frá og með vori 2021 verði áfram tekið inn í skólann á grundvelli einkunna við lok grunnskóla, þó þannig að aldrei verði fleiri en 60% af einu kyni meðal nýnema.
Á þeim rúmlega hundrað árum sem liðin eru frá stofnun skólans hefur margt breyst. Nemendafjöldinn hefur margfaldast og námsframboðið orðið fjölbreyttara með hverjum áratuginum sem liðið hefur. Þó má segja að Verzlunarskólinn hafi á þessum hundrað árum viðhaldið þeim sérkennum sínum að vera framsækinn skóli sem jafnan hefur leitast við að bjóða upp á fjölbreytt nám sem svarar kröfum síns tíma. Um leið hefur ætíð verið lögð mikil áhersla á að nemendum líði vel í skólanum og yfirstjórn skólans hefur, einkum frá og með árinu 1931, lagt mikla áherslu á að félagslíf nemenda sé gott.
Alls brautskráðust 22 nemendur með danskt stúdentspróf og þar á meðal voru fimm íslenskir nemendur.
Í upphafi árs hófust viðamiklar endurbætur á skólabyggingu Verzlunarskóla Íslands. Húsið var endursteinað með gráum tónum og öllum gluggum skipt út. Þessar breytingar færa Verzlunarskólanum nýja ásýnd og meira flæði og tenging myndaðist við viðbyggingu skólans.
Skólinn hlaut viðurkenningu fyrir að hafa jafnað kynjahlutfall í framkvæmdastjórn.
Við inntöku gátu nemendur með annað heimamál en íslensku óskað eftir að íslenska fengi einfalt vægi, og í staðinn yrði tvöfalt vægi á annarri grein.
Verzlunarskólanum var aftur veitt viðurkenning Jafnvægisvogarinnar fyrir jafnrétti í efsta stjórnendalagi.
Skólinn tók þátt í samstarfi við Barnaverndarþjónustu Reykjavíkur, Lögregluna á höfuðborgarsvæðinu, Heilsugæsluna og framhaldsskóla í Reykjavík til að tryggja velferð barna í viðkvæmri stöðu.
Markmiðið með símaboxunum er að nemendur nýti kennslustundir sínar betur með því að hvíla símana meðan á kennslu stendur.